Tidlegare landslagsspelar blir ny konsernsjef i Kværner
Tidlegare landslagsspelar Karl-Petter Løken er tilsett som ny konsernsjef for industriselskapet Kværner.
I ei pressemelding tysdag opplyser selskapet at han vil tiltre som konsernsjef i løpet av våren, etter at han har avslutta sin noverande jobb som leiar for prosjektutvikling i oljeselskapet Lundin Norway.
- Vi er glade for at Løken vil overta roret. Han har ei sterk forståing av industrien, han kjenner Kværner også frå kundesida, og han har brei erfaring med å utvikle lag som kan levere topp resultat, seier Kværner-styreformann Leif-Arne Langøy.
Løken (51) er utdanna sivilingeniør frå NTNU i Trondheim. Sidan 1991 har han hatt nøkkelstillingar innan olje- og gassindustrien i selskap som Statoil, Aker Solutions og Lundin Norway. I mange år var Løken parallelt med den industrielle karrieren også fotballspelar på toppnivå i Noreg og enda opp med 36 A-landskampar.
Han overtar for Jan Arve Haugan, som i februar slutta i Kværner for å overta som toppsjef i då nyetablerte Aker Energy.
Karl Petter Løken under kampen mellom Rosenborg og AC Milan på Lerkendal i 1996. Foto: Tor Richardsen / NTB scanpix
Karl Petter Løken med kongepokalen etter cupfinalesigeren mot Lillestrøm i 1992.
Foto: Pål Hansen / NTB scanpix
