Trump kallar atomavtalen «galskap» og «katastrofe»

Den franske presidenten er på statsbesøk i USA, der han er blitt tatt imot av Trump med pomp og prakt.

Ei av dei vanskelegaste politiske sakene for dei to presidentane er den internasjonale avtalen om atomprogrammet til Iran. Trump har ei rekke gonger kritisert avtalen, mens nærmast alle andre stormakter i verda vil behalde den.

Trump og Macron skulle diskutere saka tysdag, og i forkant av samtalene fekk avtalen igjen ramsalt kritikk av den amerikanske presidenten.

Samtidig åtvara han om at Iran vil få «større problem enn dei nokon gong har hatt», viss landet startar opp att atomprogrammet. Iranske styresmakter har gjort det klart at dei vil gjere det viss USA trekker seg frå avtalen.

Macron er den første utanlandske statsleiaren som er kommen på offisielt statsbesøk i USA etter at Trump overtok som president. Tysdag kveld vil dei to presidentane og rundt 150 andre gjester vere til stades under ein offisiell middag i Det kvite hus.

(©NPK)

USAs president Donald Trump (t.h.) saman med den franske presidenten Emmanuel Macron og ektefellane deira Melania og Brigitte under ein seremoni utanfor Det kvite hus tysdag. Foto: AP/NTB scanpix

Presidentane Donald Trump og Emmanuel Macron under ein seremoni utanfor Det kvite hus tysdag. Foto: AP/NTB scanpix