Unilever sel margarin for 66 milliardar kroner
Den europeiske daglegvaregiganten Unilever vil selje margarinverksemda si til det amerikanske investeringsselskapet KKR for drygt 66 milliardar kroner.
Unilever har fått eit bindande tilbod frå KKR om kjøp av verksemda, heiter det i ei utsegn frå seljaren fredag.
Unilever avviste eit bod frå den amerikanske matgiganten Kraft Heinz om å kjøpe heile selskapet for rundt 1.183 milliardar kroner tidlegare i år. Sidan kunngjorde Unilever at dei ville selje ut margarindrifta som eit ledd i ein omstruktureringsplan. Den omfattar merker som Flora, Blue Band og Rama.
Det er venta at avtalen vil bli sluttført innan midten av 2018, så framt den blir godkjent av styresmaktene.
Unilever eig over 400 hushaldingsmerker, mellom dei Dove, Knorr og Lipton og har rundt 169.000 tilsette verda rundt. Det multinasjonale industrikonsernet blei danna då den nederlandske margarinprodusenten Margarine Unie og den britiske såpefabrikken Lever Brothers slo seg saman i 1930.
(©NPK)
