Visumtrøbbel for Molde-fansen
Det kan bli vanskeleg for Molde-fansen å følgje bortekampen mot Zenit St. Petersburg i europaligakvalifiseringa.
Allereie torsdag til veka tar Molde turen til Russland. Så seint som torsdag kveld blei Moldes avansement til siste hinder før gruppespel sikra.
- I utgangspunktet er det same opplegget som vi har hatt tidlegare denne sommaren. Men problemstillinga denne gangen er at ein må ha visum. Dersom ein ikkje har ordna visum enno, vil det truleg vere for seint å få det no, seier administrerande direktør Øystein Neerland i Molde til Romsdals Budstikke.
- Det er svært kjedeleg at det er slik, men vi rår ikkje over russiske myndigheiters rutinar på dette området, fortset Molde-toppen overfor lokalavisa.
Neerland opplyser at klubben har fått beskjed om at det normalt tar frå fem til sju dagar å få turistvisum til Russland.
- Tidslinja mellom avklaringa på kven vi skulle møte og fram til vi drar, inneheld eigentleg berre to arbeidsdagar, så då blir det veldig vanskeleg å få til dette dersom du ikkje har visum frå før. Det er ein veldig spesiell situasjon, medgir Neerland.
Molde har sjølv vore tidleg ute og søkt om visum til spelarar, trenarar og støtteapparat.
(©NPK)
Ole Gunnar Solskjær tar med seg Molde til Russland til veka, men det kan bli utan MFK-fansen. Foto: Marit Hommedal / NTB scanpix
