Weng spår OL-gull til Kalla
Heidi Weng meiner Charlotte Kallas «meisterskapshovud» gir svensken ein fordel før OL neste månad. Ho trur Kalla kjem til å ha gull med heim frå Sør-Korea.
Søndag vart Kalla nummer to då Krista Pärmäkoski vann ti kilometer klassisk i verdscuprennet i slovenske Planica. Svensken var drygt tre sekund bak finnen, mens trear Weng var halvminuttet bak der igjen.
I eit intervju med svenske Aftonbladet får Weng spørsmål om ho trur Kalla kan få det tøft i OL, spesielt med tanke på at løparar som Marit Bjørgen og Ingvild Flugstad Østberg ikkje var med i Planica. Begge er naturleg nok på plass i OL.
- Ein må alltid rekne med dei norske. Samtidig er Charlotte alltid utruleg god til å finne forma når det verkeleg gjeld, noko eg beundrar henne veldig for. Nokre gonger har ho vore litt bak oss andre, men plutseleg kjem ho til meisterskap og er dronninga, seier Weng til avisa.
- Ho er ein å rekne med. Charlotte er ei eg faktisk ser veldig opp til med tanke på å prestere når det gjeld. Kanskje eg skal be henne om nokre tips og råd, legg 26-åringen til.
Weng tek opp att at Kallas vinnarskalle i meisterskap kan bli avgjerande under leikane i Pyeongchang.
- Vi andre er kanskje i toppen meir (i løpet av sesongen), men ho er utruleg god til å finne meisterskapsform. Eg trur Charlotte kjem til å få gull i OL.
- På kva distanse då?
- 10 kilometer skøyting, svarar den norske verdscupleiaren.
(©NPK)
Langrennsstjerna Heidi Weng (t.h.) er full av beundring for sin svenske kollega Charlotte Kalla (t.v.). Foto: Terje Bendiksby / NTB scanpix
