117 koronadødsfall i Sverige gjennom helga
Sidan fredag er det registrert 117 koronarelaterte dødsfall i Sverige. Det er påvist 17.629 nye smittetilfelle.
Så langt har pandemien kravd 6.798 liv i Sverige, og 260.758 personar har fått påvist smitte, viser tal frå Folkhälsomyndigheten.
– Vi har ei aukande spreiing i alle aldersgrupper akkurat no, seier statsepidemiolog Anders Tegnell.
Han seier Sverige blir mørkare på det europeiske smittespreiingskartet, medan andre land byrjar å lysne noko.
– Vi ligg kanskje på eit slags platå, men med ei omfattande smittespreiing som verkeleg ikkje har avteke.
Svenskane ventar no på råd frå styresmaktene for jula, men Tegnell seier dei truleg ikkje kjem før torsdag neste veke.
I Danmark er det registrert ni dødsfall det siste døgnet, opplyser Statens Serum Institut. Totalen er dermed oppe i 846. 81.949 smittetilfelle er registrerte, 1.468 det siste døgnet. 254 covid-19-pasientar er innlagde på danske sjukehus. 38 av dei ligg på intensivavdeling, 24 med respirator.
(©NPK)
Statsepidemiolog Anders Tegnell seier Sverige blir mørkare på det europeiske smittekartet. Foto: Naina Helén Jåma / TT NYHETSBYRÅN / NTB
