Nordre

16-åring varetektsfengsla etter drap på open gate i København

To gutar på 14 og 16 år er mistenkte for drap etter at ein 18-åring vart skoten i hovudet på open gate i Frederiksberg i København i helga.

16-åringen vart onsdag varetektsfengsla i fire veker. På grunn av den låge alderen sin skal han dei neste vekene halde til på ein lukka institusjon. 14-åringen er under den kriminelle lågalderen og er overlaten til sosialtenesta. Han må ikkje møte i retten.

Offeret var ein 18 år gammal ungdom av albansk opphav, som ifølgje politiet vart skoten i hovudet med ein pistol.

Hendinga skjedde i Frederiksberg vest i København fredag kveld, og 18-åringen døydde søndag av skadane.

Kledd i blått

Måndag kveld vart 16-åringen arrestert. Då han møtte i retten onsdag, var han kledd i blått frå topp til tå. Fengslingsmøtet gjekk for lukka dører, og politiet har ikkje sagt noko om kva bevis dei har mot 16-åringen.

Politiet har tidlegare avvist at gutane har tilknyting til kriminelle bandar, og den innleiande etterforskinga tyder ikkje på at drapet var planlagt. Motivet er ikkje kjent.

Høyrde krangling

Augnevitne har fortalt at 18-åringen stod saman med fleire andre då dei to sikta dukka opp. Det skal ha oppstått ein krangel, og det vart høyrt høge rop før skotet.

Saka har fått stor merksemd i Danmark, og mange møtte opp for å følgje fengslingsmøtet på onsdag. Interessa var så stor at møtet vart flytta til eit større rettslokale med plass til fleire tilhøyrarar.

Frederiksberg er ein bydel vest i København, men også ein eigen kommune innan den danske hovudstadsregionen.

(©NPK)

ANNONSE
Annonse
ANNONSE
Annonse