200 mistar jobben etter Wintershall DEA-fusjonen
200 jobbar blir kutta etter fusjoneringa av det tyske oljeselskapet Wintershall og DEA Noreg.
Dei to selskapa har til saman i overkant av 650 tilsette i Noreg, og nesten ein tredel av desse mistar altså jobben.
Nedskjeringane vil skje i 2020, opplyser kommunikasjonssjef Kjetil Hjertvik I DEA Noreg til Nettavisen. Han seier dei som mistar jobben i stor grad er innleigd arbeidskraft.
Fusjonen mellom tyske Wintershall og DEA Noreg vil gjere selskapet til det sjuande største oljeselskapet på norsk sokkel, og selskapet har mål om å auke produksjonen med 40 prosent innan starten av neste tiår. Det blir venta at fusjonen blir gjennomført i det første kvartalet i år.
Selskapet kuttar òg 800 jobbar i Tyskland. Til saman har selskapet 4.200 tilsette på verdsbasis, og ein firedel av desse mistar jobben etter fusjonen. Norske Maria Moræus Hansen er nestsjef i selskapet.
(©NPK)
Logo DEA Norge.
Illustrasjonsfoto: Gorm Kallestad / NTB scanpix
