Nordre

200 saksøker tre selskap etter dødsbrann i London

Tre selskap er saksøkte av 200 personar etter brannen i Grenfell Tower i London i 2017 for feil i eit kjøleskap, der brannen starta, og fasadekledninga.

Heile 71 personar døydde i brannen i den kommunale bustadblokka vest i London, der elden spreidde seg svært raskt.

Brannen skal ifølgje søksmålet ha starta i eit kjøleskap, med feil eller feilvare, i femte etasje. Ei av årsakene til at flammane spreidde seg så raskt, var at bygningen var kledd med fasadeplater som inneheldt brennbart materiale.

Robert Mongeluzzi i Saltz Mongeluzzi Barrett & Bendesky kunngjorde søksmålet på Twitter tysdag.

Advokatfirmaet representerer 200 saksøkarar, både overlevande etter brannen og pårørande av omkomne, som saksøker tre selskap som produserte enten kjøleskapet eller fasadekledninga: Whirlpool, Arconic Inc., og Celotex Corporation.

Ifølgje søksmålet visste Celotex at fasadeplatene ikkje burde brukast for bygg som var så høge som Grenfell Tower, men valde likevel å levere vara.

Søksmålet er neste 600 sider langt, men inneheld ikkje opplysningar om kor mykje saksøkarane krev i erstatning.

(©NPK)

Advokat Robert Mongeluzzi legg fram bakgrunnen for søksmålet mot tre selskap etter brannen i London i 2017. Foto: Matt Rourke / AP / NTB scanpix

Eksempel på fasadekledning frå Grenfell Tower vart vist fram på ein pressekonferanse i Philadelphia tysdag. Foto: Matt Rourke / AP / NTB scanpix

ANNONSE
Annonse
ANNONSE
Annonse