209 nye koronadødsfall i Storbritannia siste døgn
1.228 menneske er no døde etter å ha vorte smitta av koronaviruset i Storbritannia. Regjeringa seier dei strenge tiltaka som er innførte, vil vare lenge.
209 nye dødsfall er registrerte siste døgn, opplyser britiske styresmakter søndag ettermiddag.
19.522 personar er registrerte smitta av viruset i Storbritannia. Det er over 2.400 nye tilfelle frå laurdag til søndag.
Styresmaktene seier at dei strenge tiltaka som er sette i verk, med tilnærma full nedstenging av landet, vil vare «ei betydeleg stund», truleg fram til juni.
– Vi kan ikkje gi noko eksakt tidspunkt no, men eg trur alle må førebu seg på ein betydeleg periode med desse tiltaka, seier Michael Gove, minister i Boris Johnsons regjering.
(©NPK)
Ambulansar står parkerte utanfor eit konferansesenter i London som blir gjort om til eit mellombels sjukehus. Foto: AP / NTB scanpix