Abbas til FN: – Israel ikkje lenger ein partnar i fredsprosessen
Palestinas president Mahmoud Abbas langa ut mot Israel frå talarstolen i FN fredag. Dei kan ikkje lenger vurderast som ein påliteleg partnar i fredsprosessen, sa han.
Utsegnene kjem dagen etter at Israels statsminister Yair Lapid sa at han støttar ei tostatsløysing. Abbas omtalte uttalen som ei positiv utvikling, men at det berre kan bevisast ved at partane går i forhandlingar omgåande.
– Israel prøver, gjennom sin overlagde og medvitne politikk, å øydeleggje tostatsløysinga. Dette beviser utvitydig at Israel ikkje trur på fred. Derfor har vi ikkje lenger ein israelsk partnar som vi kan snakke med, sa 87-åringen frå talarstolen i FN.
Abbas gjentok kritikken om at Israel har fått opptre ustraffa mot menneske på Gazastripa og på Vestbreidda, og at håpet til palestinarane om ei fredsløysing svinn.
Samtidig skulda han FN og det mektige medlemmer, særleg USA, for å verne Israel.
Dei israelsk-palestinske fredsforhandlingane har vore stranda sidan 2014. Den siste tida har den palestinske leiaren slite med aukande uro i delar av Vestbreidda, og populariteten hans blant palestinarane har gått ned til eit historisk lågmål.
Fleire palestinarar har skulda styresmaktene for å vere israelske nikkedokker og for å akseptere okkupasjonen av Vestbreidda.
(©NPK)
Frå talarstolen i FN langa Palestinas president Mahmoud Abbas ut mot Israel. Foto: Julia Nikhinson / AP / NTB
