Amerikansk gigant kjøper norske Nabobil
Den norske bildelingstenesta Nabobil er kjøpt for over 100 millionar kroner av den største aktøren i verda på denne marknaden, amerikanske Getaround.
Med oppkjøpet, som vart gjort kjent tysdag, utvidar Getaround marknaden sin til òg å omfatte Norden, opplyser Nabobil i ei pressemelding.
- Vi bygger ein global organisasjon, og med erfaringa, pågangsmotet og dei verdiane som Nabobil-teamet tilfører Getaround, vil dei bidra til å nå målet vårt om at folk skal kunne dele bilane sine overalt, seier gründer og administrerande direktør Sam Zaid i Getaround.
Det norske selskapet trur den planlagde ekspansjonen i Norden vil gå raskare med amerikanarane på laget.
- For Nabobils kundar vil oppkjøpet innebere store løft i tilbodet og forbetra teknologi. Dette er ei stor anerkjenning for dei trufaste brukarane våre, tilsette og aksjonærar, seier Nabobil-gründerane Christian Hager, Jacob Tveraabak og Karl Munthe-Kaas i ein samla kommentar.
(©NPK)
