Andreas Stjernen avslutta karrieren med 2.-plass i Granåsen, Johansson tapte terreng i Raw Air

Andreas Stjernen enda på andreplass i det siste rennet sitt på toppnivå. Ryoyu Kobayashi vann verdscuprennet i Granåsen.

Trønderen hoppa særs bra på heimebane, men klarte ikkje å gjere noko med suverene Kobayashi, som allereie har sikra samanlagtssigeren i verdscupen.

Japanaren leverte to kjempehopp på 141 og 141,5 meter. Med det sikra han sigeren 10,4 poeng føre Stjernen, som hoppa 137 to gonger.

Sjølv om sigeren glapp, avslutta trønderen karrieren med ein god prestasjon. 30-åringen legg no skia i bua og kan sjå tilbake på eitt OL-gull, eitt VM-gull, eitt VM-sølv og éin VM-bronse i lagkonkurransar. Han står òg med to individuelle NM-gull og éin verdscupsiger.

Kraft rykte ifrå

Robert Johansson jaktar samanlagtssigeren i Raw Air og låg 5,9 poeng bak Stefan Kraft på førsteplassen før rennet på torsdag. Den avstanden auka ytterlegare då Johansson måtte ta til takke med ein tiandeplass med 270,6 poeng, medan Kraft enda på tredjeplass.

Johann André Forfang vart Noregs nest beste på femteplass. Tromsøværingen fekk totalt 275,6 poeng for hopp på 134 og 132,5 meter.

Marius Lindvik og Robin Pedersen kom seg til finaleomgangen, men klarte aldri å utfordre teten. Pedersen vart nummer 28 med 240,2 poeng, medan Lindvik enda på 30.-plass

Granerud skuffa

Halvor Egner Granerud har slite den siste tida og fekk det heller ikkje til å klaffe i Granåsen torsdag. Trass i eit hopp på 125 meter heldt ikkje 120,2 poeng til finaleplass for Asker-guten, som vart nummer 32.

Thomas Aasen Markeng hoppa like langt som Lindvik, men dårlegare stilpoeng resulterte i 117 poeng, noko som ikkje heldt til finaleplass. 18-åringen enda på 36.-plass.

Fredag skal hopparane i aksjon i Vikersund.

(©NPK)

Andreas Stjernen avslutta karrieren med andreplass i rennet i Granåsen torsdag. Foto: Tore Meek / NTB scanpix

ANNONSE
Annonse
ANNONSE
Annonse