Ap-nestor vil samarbeide med MDG

Aps tidlegare partisekretær Martin Kolberg tar til orde for eit samarbeid med Miljøpartiet Dei Grøne (MDG) for å sikre eit regjeringsskifte i 2021.

- Vi må få vekk Høgre-regjeringa. Dei må bort. Det må vi gjere saman med dei andre partia på venstresida, inkludert Miljøpartiet Dei Grøne, seier Kolberg i eit intervju med Dagsavisen.

Ap-nestoren var partisekretær då Ap inngjekk det raudgrøne samarbeidet med SV og Senterpartiet. No meiner han alliansen må bli endå grønare og samanliknar dagens klimaengasjement med folkerørsla mot EU, den gong EF, i 1972.

- Jo før vi erkjenner at miljørørsla er ein liknande type folkerørsle, jo betre. Utfordringa vår no er å handtere miljøspørsmålet, og det må vi gjere offensivt, seier Kolberg.

Det gjeld òg fagrørsla, understrekar han.

- Den største styrken til norsk fagrørsle har alltid vore at ho er framtidsretta. Det må ho vere no òg.

Sentrale tillitsvalde i Fellesforbundet uttalte likevel nyleg at dei ikkje ønsker noko regjeringssamarbeid mellom Ap og MDG så lenge miljøpartiet krev stans i oljeproduksjonen.

I ei meiningsmåling i byrjinga av oktober stilte eit fleirtal av Aps og MDGs veljarar seg positive til eit regjeringssamarbeid etter stortingsvalet i 2021.

(©NPK)

Ap-nestor og stortingsrepresentant Martin Kolberg tar til orde for å utvide det raudgrøne samarbeidet med MDG.
Foto: Terje Pedersen / NTB scanpix

Annonse
Annonse