Nordre

ANNONSE
Annonse

Ap vil gi meir til sjukehusa

Arbeidarpartiet legg inn 1,6 milliardar kroner meir til sjukehusa i sitt alternative budsjettforslag enn det regjeringa foreslår i statsbudsjettet.

Ap-leiar Jonas Gahr Støre seier til NRK at forslaget til statsbudsjett svekkjer tilbodet til pasientar innan rus og psykiatri.

- Her er det ein veldig farleg kombinasjon av eit trongt sjukehusbudsjett og ein veldig trong kommuneøkonomi. Det går ut over dei svakaste pasientane som blir liggjande mellom, seier Støre.

Sjukehusa får ein vekst på 1,3 milliardar kroner i forslaget til statsbudsjett. Ap meiner det er under halvparten av kva som trengst.

- Då treng vi om lag 1,6 milliardar kroner meir, seier Støre til NRK.

Helseminister Bent Høie (H) hevdar at helsebudsjettene frå den raudgrøne regjeringa i åra 2005-2013 i snitt var «betydeleg svakare» enn forslaget frå regjeringa i år.

- I så fall er dette ein ganske tøff dom over dei helsebudsjettene Støre i si tid la fram, seier han.

Nestleiar Olaug Bollestad i KrF er likevel langt på veg einig med Ap. Ho seier at når kommunane får ein stadig større rekning for dei pasientane som krev mest behandling kombinert med at sjukehusa skal skrive ut pasientar tidlegare, så er det ein «farleg veg».

Arbeidarpartiets alternative forslag til statsbudsjett blir lagt fram i november. Før den tid skal KrF ha tatt stilling til om partiet ønsker å gå inn i regjering med Ap og Senterpartiet, søke makt med den sitjande regjeringa eller fortsette i opposisjon som i dag.

(©NPK)

Ap-leiar Jonas Gahr Støre meiner at budsjettopplegget til regjeringa er farleg for dei svakaste pasientane. Helseminister Bent Høie (H) seier det er ein tøff dom over dei budsjetta Støre i si tid var med på legge fram. Foto: Erlend Aas / NTB scanpix

ANNONSE
Annonse
ANNONSE
Annonse