Assange går til sak mot Ecuador for brot på «grunnleggande rettar»

- Julian Assange oppretta i dag sak der han skuldar Ecuadors regjering for å ha brote dei grunnleggande rettane og fridommen hans, heiter det i ei fråsegn frå WikiLeaks fredag.

Regjeringa i Ecuador hadde fram til fredag kveld, norsk tid, enno ikkje kommentert Assanges søksmål.

I mars i år mista Assange internettilgangen, han fekk inndrege mobiltelefonen og vart nekta å ta imot gjester på ambassaden. Ambassaden grunngav tiltaka med at Assange hadde brote ein skriftleg avtale frå i fjor, der han forplikta seg til å ikkje blande seg inn i andre lands saker.

Måndag fekk han tilbake moglegheita til å delvis kommunisere med omverda.

Tysdag fortalde BBC at ambassaden truar med å konfiskere Assanges katt. Katten er ofte å sjå gjennom vindauga, iblant med eit katteslips om halsen. Assange fekk katten av barna sine. Katten har eigen profil på Twitter.

Ambassaden meiner Assange ikkje steller godt nok med katten. Om kattevelferda ikkje blir betre, vil ambassaden gi katten til ein dyrevernsorganisasjon, heiter det.

WikiLeaks-grunnleggaren Assange har vore i den ecuadorianske ambassaden i London sidan 2012 for å unngå å bli utlevert til Sverige på grunn av ei skulding om seksuelle overgrep. Sverige har sidan droppa utleveringskravet, og Assange har vorte ecuadoriansk statsborgar, men han risikerer stadig å bli arrestert i Storbritannia.

(©NPK)

Julian Assange har budd på Ecuadors ambassade i London sidan 2012. Han har ikkje kunna forlate ambassaden av frykt for å bli arrestert. No saksøker han Ecuador for brot på grunnleggande rettar og fridom. Foto: AP / NTB scanpix