Assanges utleveringssak trekkjer i langdrag
Tidlegast i mai vil det bli klart om Storbritannia går med på å utlevere WikiLeaks-grunnleggjaren Julian Assange til USA, opplyser dommaren i utleveringssaka.
USA krev 48-åringen utlevert for brot på spionasjelova gjennom publisering av store mengder graderte amerikanske diplomatiske og militære dokument.
Assange vart i 2010 ettersøkt av Sverige, mistenkt for valdtekt og seksuelle overgrep mot to svenske kvinner.
Etter at den britiske høgsteretten slo faste at han kunne utleverast til Sverige, søkte han tilflukt i Ecuadors ambassade i London.
I april i fjor vart han kasta ut av ambassaden, arrestert av britisk politi og dømd til 50 vekers fengsel for brot på kausjonsvilkåra. Samtidig vart det teke ut spionasjetiltale mot han i USA.
Kravet til amerikanarane om utlevering blir no behandla av Westminster Magistrates' Court i London, der saka trekkjer i langdrag.
Etter planen skulle saka rundast av etter ei fem dagar lang høyring i slutten av februar, men dommar Vanessa Baraitser opplyste torsdag at det òg blir lagt opp til ei tre veker lang høyring i mai.
Assange tilbakeviser skuldingane om spionasje og hevdar at han som journalist blir verna av den amerikanske grunnlova.
(©NPK)
Demonstrantar som støttar WikiLeaks-grunnleggjaren Julian Assange var torsdag på plass utanfor rettsbygningen i London. Foto: AP / NTB scanpix
