Astrup i Brussel for å diskutere digitale utfordringar

I tillegg til møtet med Margrethe Vestager, møtte Astrup òg EU-parlamentarikarar og sjefen for EUs datatilsyn.

– Vi har diskutert både forbrukarrettar, 5G-tryggleik, konkurranse med globale teknologiplattformer og kunstig intelligens, seier Astrup til NTB på slutten av ein hektisk dag i Brussel.

– Som eitt av dei mest digitaliserte samfunna i Europa, meiner eg Noreg har noko å bidra med i diskusjonen. Men vi diskuterte òg problemstillingar som Noreg er for lite til å kunne løyse på eiga hand, seier statsråden.

Han brukte Schibsted som døme i samtalen med Vestager om eit problem med appar som blir distribuerte via Apple.

– Viss du lastar ned ein Schibsted-app – VG, Finn, Aftenposten – så tek Apple mellom 15 og 30 prosent av omsetninga og beheld alle kundedataa, og det er klart at det er heilt urimeleg, forklarer han og meiner dette er noko EU må engasjere seg i.

Astrup har òg nytta høvet til å selje inn Noreg som datasenterland.

– Veksten i data vil vere kraftig, og éin stad må desse dataa lagrast. Noreg har både plass og skalerbar fornybar straum i form av vasskraft. Det kan skape mange arbeidsplassar og bli eit nytt industrieventyr, meiner statsråden.

(©NPK)

Nikolai Astrup var innom ei rekkje tema då han besøkte EU torsdag for å diskutere den digitale utviklinga. Arkivfoto: Heiko Junge / NTB scanpix