Auke for Ap etter abortkamp
Kvinnedelen blant veljarane til Ap har stige til 57 prosent etter at partiet gjekk ut mot Erna Solbergs abortfrieri til KrF, viser ny måling.
Kvinnene har i årevis utgjort eit fleirtal blant Arbeidarpartiets veljarar, men delen har falle drastisk etter varslingssakene mot Trond Giske i vinter. No viser DNs måling at trenden har snudd, i ein periode der partiet har stått i front mot å endre abortlova.
Tala frå avisa viser at kvinnedelen frå januar til og med oktober i år var på 51 prosent. No har talet stige til 57 prosent, noko som er eit høgare nivå enn på fleire år.
- Det er mange som er urolege og bekymra for kva slags endringar Høgre vil gjennomføre i abortlova, samtidig som folk er trygge på kvar Ap står, at vi er på lag med kvinnene og retten deira til å avgjere over eigen kropp, seier nestleiar Hadia Tajik.
Samtidig ønsker ho ikkje å konkludere med at abortsaka er årsaka til auken.
- Det er rett at vi hadde eit lågare nivå i vinter, men eg vil vere forsiktig med å seie kva årsaka var. Det var ei turbulent tid for oss, som òg viste seg i målingane, seier Tajik.
(©NPK)
Aps nestleiar Hadia Tajik er forsiktig med å trekkje ein konklusjon om kvifor kvinnedelen i Ap aukar, men fortel om stort engasjement blant kvinnene i abortsaka. Foto: Berit Roald / NTB scanpix
