Bane Nor-tilsette har låg tillit til eiga leiing

På ein skala frå 1 til 5 skårar leiinga 3,2 på spørsmålet om tillit, skriv Aftenposten.

Undersøkinga er gjort av Rambøll. Ifølgje tal som konsernsjefen skal ha fått frå dei, skårar samanliknbare bedrifter i snitt 3,7.

– Personleg synest eg det er trist, men vi er der vi er. Det indikerer at vi har noko å jobbe med når vi ligg såpass lågt, sa Bane Nors konsernsjef Gorm Frimannslund på eit allmøte der tala i medarbeidarundersøkinga var tema.

Tilliten til måten konsernleiinga leier verksemda på peikar seg ut og ligg markant lågare enn resten av svara.

Frimannslund seier til Aftenposten at han ikkje er fornøgd med resultatet.

– Eg er fornøgd med at medarbeidarane svarer ærleg, men dette er ikkje tilfredsstillande for oss. Vi må brette opp ermane og gjere ein betre jobb, seier han.

Frimannslund seier han ikkje har vurdert stillinga si.

(©NPK)

Konsernsjef Gorm Frimannslund i Bane Nor med eit utsnitt av kabelen som har skapt problem på Follobanen. Foto: Håkon Mosvold Larsen / NTB