Banktilsett arrestert i politiaksjon i Agder

Ein tilsett i ein bank i Aust-Agder vart i førre veke arrestert i ein politiaksjon og sikta for grovt underslag og identitetskrenking.

Politiet i Agder politidistrikt aksjonerte måndag førre veke mot bustaden til ein mannleg tilsett i banken etter at internrevisjonen avdekte avvik, ifølgje Fædrelandsvennen.

- Den førebelse siktinga er på grovt underslag overfor banken og identitetskrenking i samband med at mannen har tatt opp lån i namnet til uvitande kundar, seier politiadvokat Geir Magne Søfteland i Agder politidistrikt.

Det var Lillesands-Posten som først omtalte saka.

Ifølgje politiadvokaten vart bustaden til mannen ransaka, og det vart gjort beslag. Arrestasjonen skal ha gått føre seg utan dramatikk. Etter fleire timar i avhøyr skal den sikta ha erkjent straffskuld for forholda. Han vart seinare lauslaten.

Det er førebels ukjent kor store beløp det er snakk om. Ifølgje Fædrelandsvennen vil siktinga truleg bli utvida når etterforskinga er ferdig.

- Målet er å avdekkje omfanget av svindelen, kor mange kundar det er tatt opp lån for, og kor store beløp det dreier seg om, seier Søfteland.

(©NPK)

Illustrasjonsfoto: Gorm Kallestad / NTB scanpix

Annonse
Annonse