Barkholt blir landslagstrenar for orienteringskvinnene

Susanne Barkholt får ansvaret for dei norske O-kvinnene. Ho tar over for Brigitte Husebye frå neste sesong.

Det har lenge vore kjent at landslagstrenar Birgitte Husebye - som har ansvar for dei kvinnelege landslagsløparane i orientering - takkar for seg etter VM i Østfold i august.

Noregs Orienteringsforbund har med denne bakgrunnen arbeidd ei stund med å finne etterfølgjaren hennar.

Barkholt har vorte samd om ein treårskontrakt. Ho har dei ni siste åra vore landslagssjef i Sverige - med ansvar både for kvinner og menn. No jaktar Barkholt nye utfordringar.

- I søkinga vår etter ny trenar er Susanne (Barkholt) eit optimalt val. Ho har sterk fagleg kompetanse og lang erfaring som topptrenar på internasjonalt nivå, seier Noregs landslagssjef Jørgen Rostrup.

- Det er mange framstormande norske løparar på kvinnesida med stort potensial som eg ser fram til å arbeida med, seier Barkholt.

Ho startar i jobben som norsk landslagstrenar 1. november, og blir dermed med heilt frå starten i planlegginga av ny sesong. 49-åringen har to barn og bur i Trollhättan på den svenske Vestkysten.

Ho vil framleis bu i Trollhättan, men vil halde til mykje i Noreg. I tillegg til å vere til stades på samlingar og konkurransar, vil ho drive omfattande reiseverksemd for å følgje opp landslagsutøvarane i treningsarbeidet deira i heimesituasjonen.

(©NPK)

Susanne Barkholt får ansvaret for dei norske O-kvinnene. Ho tar over frå neste sesong.
Foto: Svenska Orienteringsförbundet / NTB scanpix

Dei norske orienteringskvinnene her representert ved Marianne Riddervold Kahrs, Kamilla Olaussen, Marie Olaussen og Marianne Andersen får ny landslagssjef i Susanne Barkholt frå neste sesong. Foto: Cornelius Poppe / NTB scanpix

Annonse
Annonse