Bastø-ferja blir halvelektrisk
Ei hybridferje skal no inn i trafikk på det mest trafikkerte ferjesambandet i Noreg, Moss - Horten. CO2-utsleppa blir dermed kutta med nesten 3.900 tonn i året.
Den nye hybridferja til Bastø Fosen skal vere i drift frå januar 2021 og skal betene sambandet saman med fire konvensjonelle ferjer. I starten kan ferja berre ladast i Horten, og kan dermed berre gå 64,5 prosent på elektrisk drift.
Dersom det seinare òg blir ladetilgang i Moss, kjem ferja til å kutte ut dieselbruken heilt, ifølgje ei pressemelding frå Enova. Det statlege føretaket støttar prosjektet med over 31 millionar kroner.
- Berre dette eine prosjektet reduserer klimagassutsleppa tilsvarande utsleppet frå 3.400 personbilar. Vi skal halvere utsleppa frå transportsektoren innan 2030. Noreg ligg i front når det gjeld grøn skipsfart, og elektrifisering er ein viktig del av politikken til regjeringa, seier klima- og miljøminister Ola Elvestuen (V) i ei pressemelding.
Moss - Horten er det 34. ferjesambandet som blir elektrifisert med støtte frå Enova.
- Det er i utgangspunktet inga enkel oppgåve å elektrifisere såpass store og energikrevjande ferjer som Bastø-ferja. Her blir det gjort mogleg av innovativ høgspentlading og den største batteripakken vi har sett på ferjer så langt, seier administrerande direktør Nils Kristian Nakstad i Enova.
Årleg kryssar 1,8 millionar køyretøy og 3,7 millionar passasjerar Oslofjorden med Bastø-ferja.
(©NPK)
Horten - Moss er det mest trafikkerte ferjesambandet i landet. Frå 2021 skal éin av dei fem ferjene delvis gå på straum. Arkivfoto: Vegard Grøtt / NTB scanpix
