Bendtner tilbake i Danmark for opptrening

Tysdag gjennomgjekk den VM-vraka spissen ein medisinsk sjekk på Lerkendal. Han reise umiddelbart tilbake til København, der han skal fortsette opptreninga etter skaden han pådrog seg mot Brann.

Ein skade som sette han utanfor VM-deltaking for Danmark.

- Vi undersøkte Nicklas og blei samde saman med han om eit trenings- og behandlingsopplegg som han skal følgje framover. Opptreninga skal gjennomførast med eit medisinsk apparat i Danmark som vil ha tett kontakt med oss. Vi forventar at Nicklas er speleklar til heimekampen mot Vålerenga 24. juni, fortel medisinsk koordinator Haakon Schwabe til RBK.no.

Søndag fekk Bendtner beskjed om at han ikkje er blant dei 23 utvalde i den danske VM-troppen til Åge Hareide.

- Vi hadde eit fint møte med Nicklas. Han er veldig motivert for å komme seg raskt tilbake på bana. Vi blei samde med Nicklas om at han startar opptrening i Danmark med tett oppfølging av oss. Så vil vi ha ein kontinuerleg dialog om når han skal returnere til Trondheim, seier sportslege leiar i RBK Stig Inge Bjørnebye.

(©NPK)

Nicklas Bendtner på Rosenborg blei skadd i kampen mot Brann. Han blei vraka til fotball-VM. No skal han ha opptrening i København. Foto: Ole Martin Wold / NTB scanpix