Benzema risikerer rettssak om sexvideo-skandalen frå 2015
Påtalemakta i Frankrike ber om at Karim Benzema blir stilt for ein domstol i samband med sexvideo-skandalen som skaka fransk fotball i 2015.
Påtalemakta skuldar Real Madrid-spelaren for å ha vore involvert i utpressinga av landslagskollega Mathieu Valbuena for fem år sidan.
Det var i juni 2015 at Valbuena gjekk til politiet etter å ha vorte kontakta av ein mann som sa han hadde eit sexopptak av Valbuena og kjærasten hans. Benzema er mistenkt for å ha medverka til utpressing i samband med opptaket.
No er det opp til domstolen å avgjere om ei rettssak skal finne stad og i så fall når.
Ifølgje påtalemakta skal Benzema ha oppmoda Valbuena til å betale utpressaren som trua med å offentleggjere opptaket. Real Madrid-spissen har tidlegare uttalt at han berre åtvara Valbuena om at opptaket eksisterte.
Påtalemakta opplyser at fire andre kan bli stilt for retten. Tidlegare Liverpool-spelar Djibril Cissé, som tidlegare var involvert i saka, er ikkje blant dei.
Både Benzema og Valbuena mista fotball-EM på heimebane i 2016 som følgje av saka. Real Madrid-spissen vart heller ikkje teken ut til fotball-VM i 2018, som Frankrike vann.
(©NPK)
Påtalemakta i Frankrike vil stille Real Madrid-spelar Karim Benzema for retten. Foto: Bernat Armangue / AP / NTB scanpix
Mathieu Valbuena er lagkamerat med Omar Elabdellaoui i greske Olympiakos. Foto: Giannis Papanikos / AP / NTB scanpix
