Nordre

Berge om Lagerbäck: - Verkar i det heile ikkje som han er 71 år

Sander Berge ser absolutt ingen alderskrampar hos Lars Lagerbäck (71) og tar han gjerne med vidare som landslagssjef.

Noreg speler to svært viktige EM-kvalikkampar i dagane som kjem. Laurdag smell det heime mot gruppegiganten Spania. Tre dagar seinare ventar Romania borte.

Onsdag styrte Lagerbäck endå ei økt. Ho fann stad i tre-fire varmegrader og kontinuerleg lett regn på Ullevaal stadion.

Lagerbäcks kontrakt går ut til sommaren. Han håper å fullføre han med eit EM-sluttspel på den norske benken.

Kva som skjer vidare, heng litt i lause lufta. Lagerbäck har ikkje sagt definitivt nei til å forlenge om han får sjansen.

Kan spelarstøtta gi han eit dytt til å seie ja?

- Ja, du ... Det er jo hyggeleg om spelarane synest det. Og det er jo ein fantastisk interessant gjeng fotballspelarar. Vi har ein kontrakt som varer til og med neste sommar. Vi har ikkje tatt noka vidare avgjerd, seier Lagerbäck.

- Kan avgjerda dryge heilt til mars?

- Den ballen ligg hos NFF, men eg vil jo rå dei til å få dette avklart så tidleg som mogleg. Ein må jo ta omsyn til dei som skal komme seinare og slikt. Så eg antar at vi får avklart dette mykje tidlegare enn i mars.

Ros

Genk-spelar Berge er ein av fleire unggutar Lagerbäck tidleg valde å satse på. Han debuterte som 18-åring for A-landslaget.

- Eg har vore heldig og privilegert som har fått vore ein viktig del av laget hans og spelt mange kampar, seier Berge til NTB.

- Marker du at Lagerbäck har vorte 71 år?

- Ikkje i det heile. Han er cool, roleg, har kontroll og er passe autoritær. Han er ein veldig, veldig god trenar med erfaring og som veit kva som gjeld og som er opptatt av detaljar. Det er ikkje jobben min å tilsetje trenarar, men eg er i alle fall veldig tilfreds med han, seier Berge.

Same bodskap kjem frå ei rekke andre landslagsspelarar NTB snakka med denne veka.

Veteranar

Fleire Lagerbäck-kollegaer har halde på lenge på toppnivå:

Giovanni Trapattoni var trenar for Irlands landslag til han var over 74 år.

I Premier League er Roy Hodgson (72) manager for Crystal Palace.

Alex Ferguson hadde ansvaret for Manchester United til han var 71 og eit halvt år.

- Ein må sjå seg sjølv i spegelen. Korleis ein vil leve og kva ein vil gjere. Ein blir jo heller ikkje skarpare med åra. Men det er alltid interessant å sjå kva ein kan få til, og det er eit privilegium å få det adrenalinkicket kvar gong ein samlast, seier Lagerbäck.

(©NPK)

Landslagssjef Lars Lagerbäck under Noregs trening på Ullevaal stadion onsdag.
Foto: Fredrik Hagen / NTB scanpix

Landslagssjef Lars Lagerbäck - kor mange gonger til leier han Noreg på Ullevaal stadion? Foto: Fredrik Hagen / NTB scanpix

ANNONSE
Annonse
ANNONSE
Annonse