Biden: – USA vil handle viss Kina truar suvereniteten vår
Utan å gå inn på den mykje omtalte spionballongen, sa Biden i talen sin til nasjonen at USA vil handle dersom Kina truar suvereniteten i landet.
– I dag er vi i den sterkaste posisjonen på fleire tiår til å konkurrere med Kina og kven som helst andre i verda, seier president Joe Biden.
Vidare seier presidenten at han er forplikta til å jobbe saman med Kina – både for å fremje amerikanske interesser og gagne verda.
– Men la det vere klart, slik vi gjorde det førre veke, at viss Kina truar suvereniteten vår, vil vi handle for å verne landet vårt. Og det gjorde vi, legg han til.
I helga skaut USA ned ein kinesisk ballong i luftrommet sitt, ein ballong dei meiner var i bruk til spionformål. Kina held fast på at det var ein vêrballong.
(©NPK)
President Joe Biden talte natt til onsdag til nasjonen framfor kongressen. Bak han står visepresident Kamala Harris og kongressleiar Kevin McCarthy. Foto: Jacquelyn Martin / AP / NTB
