Biden vil nominere svart kvinne som høgsterettsdommar

President Joe Biden seier han vil nominere ei svart kvinne til høgsterettsdommar, noko som aldri tidlegare har skjedd i USA.

– Eg har ikkje teke noka avgjerd bortsett frå at personen eg vil nominere, vil vere ein med eksepsjonelle kvalifikasjonar, eksepsjonell karakter, erfaring og integritet, sa Biden i ein tale torsdag.

– Og den personen vil vere den første svarte kvinna som nokosinne er nominert til USAs Høgsterett, la han til.

Kunngjeringa kom rett etter at den liberale amerikanske høgsterettsdommaren Stephen Breyer (83) torsdag stadfesta at han vil gå av.

Allereie onsdag melde ei rekkje amerikanske medium at Breyer ønskte å gå av, og at Biden truleg ville nominere ei svart kvinne til å ta den ledige plassen. Opplysningane var likevel ikkje offisielt stadfesta.

(©NPK)

Den liberale høgsterettsdommaren Stephen Breyer vil gå av med pensjon. Dermed kan president Joe Biden få moglegheit til å utnemne ein ny liberal dommar. Foto: AP / NTB

Annonse
Annonse