Biljakt enda med kollisjon i bygning i Stavanger
Ein stolen bil enda ferda i sperringane framfor lokala til Stavanger Aftenblad i Stavanger fredag ettermiddag.
Eit stort smell høyrdest i redaksjonen i det biljakta enda i mediebygget rundt klokka 16.40 fredag, skriv Stavanger Aftenblad.
Bilen køyrde rett inn i steinane som vart sett opp som sikring etter terroraksjonen mot redaksjonslokala til Charlie Hebdo i Paris i 2015. Sjåføren, ein 19 år gammal mann, vart straks lagt i bakken av politiet. Bilen fekk store skadar, og kollisjonsputene vart utløyste.
Klokka 16.30 fekk politiet ei melding frå Hundvåg om at ein mann hadde trua til seg ein bil med kniv. Han nekta å stanse for politiet som tok opp jakta. Ifølgje vitne skal bilen ha halde høg fart gjennom Stavanger sentrum før den køyrde inn i bygningen til Stavanger Aftenblad.
- Gjerningsmannen vart køyrd til legevakta for sjekk. Under forfølginga av den stolne bilen køyrde mistenkte inn i ein politibil og skadde denne, opplyser politiet.
(©NPK)
