Bjørnstad spurta inn til andreplass i Frankrike
Espen Bjørnstad tok andreplassen i kombinertrennet i franske Chaux-Neuve etter målfoto. Det var den første pallplassen hans i verdscupen.
Bjørnstad starta langrennet på fem kilometer som nummer tre. Leiar Franz-Josef Rehrl kunne ingen gjere noko med, men i kampen om å bli nest best var det nordmannen som var raskast.
Han vann spurtoppgjeret med tyske Fabian Riessle og japanske Akito Watabe.
Bjørnstad var 9,4 sekund bak vinnaren, mens tredjeplassen gjekk til Riessle. Andreplassen var det beste resultatet til 24-åringen i verdscupen nokosinne.
Jarl Magnus Riiber på sjuandeplass vart nest beste av dei norske. Han var i mål 41,2 sekund bak Rehrl. Jørgen Graabak vart nummer 16 og Jan Schmid nummer 18, mens Espen Andersen tok 19.-plassen.
Einar Lurås Oftebro vart nummer 27, mens for Magnus Krog vart det tungt på vegen mot 38.-plassen. Han var over to minutt bak vinnartida.
Laurdag fortset den klassiske trippelen i Chaux-Neuve. Då er langrennsdelen på 10 kilometer. Også søndag blir det gått renn i Frankrike.
(©NPK)
Espen Bjørnstad imponerte stort i kombinert fredag. Her er han frå eit renn i 2016. Foto: Geir Olsen / NTB scanpix
