Blakstad har venta lenge nok på EM-moroa

Normalt går det trekvart år eller der omkring frå eit lag sikrar sluttspelsplass til moroa er i gang. Denne gongen var ventetida eitt år, åtte månader og ti dagar. EM skulle vore arrangert i fjor sommar, men vart utsett for å unngå kollisjon med det koronautsette EM-et for menn og det koronautsette Tokyo-OL.

– Det kjennest veldig herleg å vere her no. Det er strokne forhold, og eg byrjar å kjenne på at det nærmar seg kamp, seier Blakstad til NTB.

20-åringen frå Ottestad har sidan debuten mot Wales i oktober 2020 lagt på til 15 landskampar. Ho har også bytt ut Rosenborg-drakta med Manchester Citys og gjennomført sitt første halvår som englandsproff mellom anna med to cupfinalar.

Stigande kurve

Kanskje er det ikkje så dumt at EM vart utsett eitt år. På denne tida i fjor hadde landslaget ei fæl rekkje bak seg med tre strake tap og 1–11 i målskår (mellom anna den historiske 0-7-smellen i Nederland). No kjem laget til EM med fem strake sigrar bak seg, med 13–3 i målskår.

– Vi har hatt ei stigande kurve under EM-oppkøyringa. Vi møtte ganske god motstand i dei siste kampane, og vi slo både New Zealand og Danmark. Det gav ei kjensle det er viktig å ta med seg inn i EM. Eg er nøgd med oppkøyringa, seier Blakstad.

Ho synest ikkje det er rart at laget har teke steg frå kamp til kamp.

Gunstig

– Jo meir ein er saman, desto betre kjemi får ein med lagvenninnene. Det har vore veldig gunstig for oss å få denne perioden der vi kan vere lenge saman. Gjennom eit år er det ikkje så ofte at vi opplever det. Med siger i dei siste kampane går vi inn i EM med sjølvtillit.

Ingen i den norske troppen lèt seg lure til å seie at opningskampen mot Nord-Irland blir grei skuring, heller ikkje Blakstad.

– Nord-Irland er eit lag vi bør slå både med tanke på EM-moglegheitene våre og ut frå nivå og ranking, men vi kjem ikkje til å undervurdere dei. Vi er innstilte på at det kjem til å bli ein tøff kamp, seier ho.

Torsdag vil høgresida i forsvaret til nordirane garantert få nokre utfordringar frå Blakstad og Guro Reiten.

(©NPK)

Julie Blakstad måtte vente lenge på å innkassere lønna etter at ho i debutkampen på landslaget var med å løyse EM-billett, men torsdag er tida omsider inne for EM-sluttspelet i England. Foto: Terje Pedersen / NTB

Julie Blakstad (til h.) måtte vente 810 dagar frå ho i landslagsdebuten sin var med å løyse EM-billett til ho torsdag spelar mot Nord-Irland i EM-sluttspelet i fotball. Foto: Terje Pedersen / NTB

Julie Blakstad (til v.) i duell med Elisabeth Terland under EM-troppens trening i England tysdag. Foto: Terje Pedersen / NTB