Nordre

Bonnier Books kjøper majoriteten i Stordalen-forlag

Bonnier Books kjøper 70 prosent av forlagskonsernet Strawberry Publishing. Petter Stordalen og dei tre andre gründerane beheld ein eigardel på 30 prosent.

Konsernet skal halde fram med å operere under merkenamnet Strawberry Publishing, opplyser Bonnier i ei pressemelding.

Administrerande direktør Håkan Rudels i Bonnier Books gleder seg til å ønskje nye kollegaer og forfattarar velkommen.

– Å kunne styrkje posisjonen vår i Noreg er strategisk viktig for oss. At Strawberrys forfattarar, tilsette og eigarar har sett eit så stort avtrykk på den norske bokmarknaden på så kort tid, er ikkje mindre enn imponerande, seier han.

Kjøpte Strawberry i Sverige og Danmark

Tidlegare i år vart det kjende at Bonnier òg kjøper Strawberry Publishing og Bazar Publishing i Sverige og Strawberry Publishing i Danmark.

Oppkjøpet av Strawberry Publishing inkluderer forfattarar som Jørn Lier Horst, Anne B. Ragde, Unni Lindell, Camilla Läckberg, Sophie Elise, Sally Rooney og Jojo Moyes. Omsetninga til forlagskonsernet auka frå 4 millionar kroner til over 100 millionar kroner mellom 2017 og 2019.

– Bokbransjen er midt i store omveltingar, og viss vi skal halde fram med å vere raske og offensive og samtidig rigge oss digitalt, må vi styrkje forlaget både økonomisk og strukturelt. Bonnier Books er ein draumepartnar for oss ─ dei har tyngda, historia og forlagsmusklane vi treng for å halde fram veksten vår og utfordre konkurrentane i den norske bokbransjen, seier Petter Stordalen, medeigar i Strawberry Publishing, om avtalen.

Store tap for Stordalen

Bonnier skriv i pressemeldinga at deloppkjøpet av Strawberry Publishing vil vere gjenstand for ein standard gjennomgang av Konkurransetilsynet.

Petter Stordalen har lide store tap under koronapandemien. Han eig mellom anna hotellkjeda Nordic Choice, og har òg eigardelar i Ving og Hurtigruten, som alle har vore hardt ramma av mindre reising under utbrotet.

Petter Stordalen og dei andre gründerane sel 70 prosent av Strawberry Publishing til Bonnier. Foto: Terje Pedersen / NTB

ANNONSE
Annonse
ANNONSE
Annonse