Børsrekord for tredje gong denne veka
Oslo Børs gjekk fredag opp 0,65 prosent til 924 poeng. Dermed er den tredje børsrekorden denne veka eit faktum.
Dagens vinnar vart selskapet IDEX, som driv med fingeravtrykksteknologi. Selskapet gjekk opp med 7,38 prosent etter at det vart kjent at det har inngått samarbeid Hengbao, som er eitt av dei største kortselskapa i Kina.
Også Rec Silicon og Tomra Systems hadde solide oppturar fredag med høvesvis 6,87 og 5,81 prosent, mens Thin Film Electronics og Salmar vart taparane med ein nedgang på 2,63 og 2,60 prosent.
Equinor-aksjen vart den mest omsette med handel på 1,2 milliardar kroner, følgt av Subsea 7 på 565 millionar kroner.
Totalt vart det omsett aksjar for 6.729 millionar kroner på den siste børsdagen denne veka.
Ute i Europa var det brei oppgang på dei store børsane. FTSE 100-indeksen i London gjekk opp med 1,59 prosent, CAC 40 i Paris gjekk opp med 0,69 prosent, mens DAX 30 i Frankfurt gjekk opp med 0,55 prosent.
(©NPK)
Oslo Børs sette fredag rekord for tredje gong denne veka. Foto: Håkon Mosvold Larsen / NTB scanpix
