Bosniske soldatar dømde for krigsbrotsverk mot serbarar
Ein domstol i Sarajevo har dømt to tidlegare militssoldatar til fengsel for krigsbrotsverk mot sivile serbarar under krigen på 1990-talet.
Senad Dzananovic er dømd til elleve års fengsel for drap og valdtekter i Sarajevo, der han var med på å ta sivile serbarar til fange. Ein av hans underordna, Edin Gadzo, er dømd til fem års fengsel.
Over 11.000 menneske vart drepne av dei serbiske styrkane som kringsette Sarajevo under krigen frå 1992 til 1995.
Dei bosniske styrkane, ofte også militsar leidde av krigsherrar, tok på si side sivile serbarar i byen til fange og mishandla dei på det grovaste.
Dzananovic og Gadzo tilhøyrde ein slik militsstyrke og tok ifølgje dommen sivile serbarar til fange for deretter å sperre dei inne i kjellarar der dei vart valdtekne, torturerte og tvinga til å arbeide og drepe.
(©NPK)
