Brann i Sibir har kravd mange menneskeliv
Minst elleve menneske har mista livet i ein brann i ein avsidesliggjande landsby i Tomsk-regionen i Sibir, opplyser russiske styresmakter.
Ti av dei omkomne var usbekiske gjestearbeidarar, medan éin var frå Tadsjikistan, melder russiske medium. Berre to personar klarte å redde seg ut i live medan éin person er sakna.
Brannen braut ut tidleg tysdag morgon lokal tid i ein låg trebygning der arbeidarane låg og sov.
Etterforskarane mistenkjer at feil i det elektriske anlegget i bygningen var årsak til brannen.
Fleire millionar arbeidarar frå Sentral-Asia jobbar i Russland. Dei er ofte dårleg betalt og bur og jobbar under elendige tryggingsforhold.
(©NPK)
