Bråstopp for charterselskapet Detur

Reiseselskapet Detur stoppar verksemda ut året og kansellerer alle reiser i chartersesongen 2022.

Natt til fredag ​​stadfesta Detur i ein skriftleg uttale til SVT at selskapet legg inn årane ein periode og avlyser resten av chartersesongen i år. Fredag morgon skriv selskapet i ein e-post til Dagbladet/Børsen at dei har opplevd ei rekkje utfordringar den siste tida, knytt til pandemien, streikar ved flyplassar, prisaukar og svakare valutakursar.

– Då dette inneber endringar i organisasjonen og i prosessane til organisasjonen, vil produksjons- og driftsaktivitetar mellombels bli sett på pause i ein periode, skriv Detur.

Den største uavhengige reiseformidlaren i landet, Finn Reise, opplyser fredag morgon til Flysmart24 at dei set salet av reiser med Detur på hald, sidan situasjonen er så uviss. Kommersiell direktør Terje Berge trur det kan bli ein lang pause.

– Vi skrur dei ikkje på og opnar ikkje for sal igjen før dei er kapitaliserte og har gjort opp for seg, seier Berge.

Fleire skandinaviske medium har meldt om Detur-kundar som har fått problem med reiser der dei må betale ekstra. Ifølgje Aftonbladet har svenske charterturistar vorte tvinga til å betale for førehandsbetalte hotellrom i tyrkiske Alanya fordi Detur ikkje hadde betalt for romma.

Dei svenske sidene til selskapet på både Facebook og Instagram er lagt ned. I meldinga til Børsen skriv Detur at selskapet treng ein omstart og beklagar ulempene og problema det kan medføre dei reisande at reisene ikkje går som planlagt.

(©NPK)

Reisande med Detur i haustsesongen får reisene sine kansellerte. Illustrasjonsfoto: Solveig Vikene / NTB

Annonse
Annonse