Bring-sjåfør filma testjuks - fekk rett svar på førehand

Austeuropeiske sjåførar som køyrer Bring-vogntog i Norden, vart instruerte i korleis dei skulle svare på ein sikkerheitstest. Ein sjåfør filma i skjul.

Sjåførane køyrde for Bring Trucking, det slovakiske dotterselskapet i Posten Noreg-gruppa. Opplæring i køyring under nordiske forhold vart gitt på hovudkontoret i Ziar nad Hronom i Slovakia. Fredag 6. mars 2015 var rumenske Lucian Mititelu ein av dei som skulle ta trafikksikkerheitskurs.

- Ein Bring Trucking-medarbeidar sa at instruktøren ikkje hadde komme enno, så for å spare tid, skulle vi begynne med testen. Ho gav oss eit skjema med nummer og bokstavar. Så dikterte ho svara på spørsmål som vi ikkje eingong hadde, seier Mititelu til Stavanger Aftenblad.

Han filma jukset med mobilen. Forbundssekretær Morten Hagen i Norsk Transportarbeiderforbund seier det er særs alvorleg at eit selskap eigd av staten held på slik.

- Vi bekreftar at videoen er frå eitt av våre sikkerheitskurs i 2015, med ein ekstern kursleverandør og ein Bring Trucking-medarbeidar som omsetjar, skriv Posten Noregs pressesjef, John Eckhoff, i ein e-post.

Posten Noreg har meldt frå til det nasjonale arbeidstilsynet om dette brotet og avsluttar samarbeidet med den eksterne kursleverandøren.

Ei undersøking frå Transportøkonomisk institutt (TØI) i 2016 viste at alle sjåførar av utanlandske vogntog manglar tilstrekkeleg kompetanse på trafikksikkerheit.

(©NPK)

Illustrasjonsfoto: Gorm Kallestad / NTB scanpix

ANNONSE
Annonse
ANNONSE
Annonse