British Open-vinnaren nærmar seg Liv-touren – nekta å svare på spekulasjonane

Den saudifinansierte golftouren har klart å lokke til seg fleire store spelarar den siste tida. No skal Smith og fleire andre profilar vere nær ved å byte ut PGA med Liv-touren.

Smith var ikkje særleg fornøgd då han vart spurd om spekulasjonane etter å ha teke den første majortittelen sin.

– Eg vann akkurat British Open, og du spør meg om det? Eg synest ikkje det er særleg bra, sa verdstoaren, ifølgje Daily Mail.

Den britiske avisa skriv at Tommy Fleetwood, Hideki Matsuyama, Marc Leishman, Bubba Watson og svenske Henrik Stenson også skal vere høgaktuelle som nye Liv-golfarar. Stenson vil i så fall miste ansvaret han fekk i mars som Ryder Cup-kaptein for Europa.

Smith vart den første australiaren til å vinne British Open sidan Liv-direktør Greg Norman gjorde det i 1993. Etter sigeren i Skottland søndag hausta Smith ros hos Norman på Twitter.

– Ein spektakulær siste runde, kompis. Ein triumf for deg og for Australia, som den første australiaren til å vinne på 29 år. Du er i godt selskap, skreiv Norman.

Uaktuelt for Hovland

Viktor Hovland enda på delt 4.-plass i British Open, der Liv-profilane Bryson DeChambeau og Dustin Johnson sikra topp 10-plasseringar.

Tidlegare i månaden vart Hovland pepra med spørsmål om Liv-touren etter ei velgjerdsturnering i Vear i Vestfold. 24-åringen stadfesta på spørsmål frå NTB at han avslo eit tilbod frå LIV Golf i fjor.

– Det er ganske uaktuelt å spele turneringar der du ikkje får verdsrankingpoeng, sa Hovland.

Til så lenge kan ein ikkje tene rankingpoeng gjennom spel på Liv-touren, som seinast sist veke kravde å få formell anerkjenning på OWGR-rankinga.

Den nyetablerte touren er særleg kontroversiell fordi han er økonomisk støtta av det statlege fondet i Saudi-Arabia. Kritikarane meiner det heile er eit forsøk på å «sportsvaske» omdømmet i landet.

Lokkar til seg stjerner

Tidlegare har Hovland uttalt til Norsk Golf at viss alle spelarane byter til Liv-touren, «gir det meg ikkje noko val».

Phil Mickelson, Brooks Koepka og Patrick Reed, i tillegg til nemnde DeChambeau og Johnson, er blant profilane som allereie har godteke lukrative tilbod frå LIV Golf.

Dersom den kontroversielle touren klarer å lokke til seg Cameron Smith, vil han bli den høgast rangerte spelaren som deltek der. Smith avanserte måndag frå 6.-plass til 2.-plass på rankinga.

Verdstrear Rory McIlroy, som søndag vart nummer tre i British Open, er ein av profilane som har gått hardt ut mot dei som har valt å delta på Liv-touren. Det gjorde også den største golfspelaren i historia, Tiger Woods, sist veke.

– Dei snur ryggen til det som har gitt dei den posisjonen dei er i no, sa Tiger Woods for vel ei veke sidan, ifølgje Sports Illustrated.

(©NPK)

British Open-vinnar Cameron Smith kan vere på veg til å byte ut spel i PGA for å bli den siste stjerna til å slutte seg til Liv-touren. Foto: Peter Morrison / AP / NTB

Viktor Hovland fortalde i starten av juli at han takka nei til eit tilbod frå LIV Golf i fjor. Foto: Beate Oma Dahle / NTB

Tiger Woods kom med sterk kritikk av LIV-touren i forkant av British Open. Foto: Peter Morrison / AP / NTB