Britisk etterretning: Ukrainske styrkar vil halde fram med taktisk spel
Ukrainske styrkar vil halde fram med å kjempe hardt for å hale ut viktige slag i tid, før dei trekkjer seg tilbake i god stand, meiner britisk etterretning.
Ukraina har gjennomført taktiske retrettar frå byar som Sievjerodonetsk før dei russiske styrkane har rokke å omringe dei. Det er ein taktikk som har fungert og truleg vil halde fram, meiner det britiske forsvarsdepartementet.
– Det er veldig sannsynleg at det vil halde fram med å vere ein nøkkelfaktor i utfallet av krigen, skriv britane i den daglege oppdateringa si.
Vidare skriv dei at dei ukrainske styrkane held sine posisjonar i Lysytsjansk, nabobyen til Sievjerodonetsk. Russiske styrkar prøver å angripe frå vest for å unngå fleire elvekryssingar, meiner britane.
Sjølve bakkekampane i Lysytsjansk går truleg føre seg rundt oljeraffineriet sørvest for bykjernen, heiter det.
(©NPK)