Canada vil ta imot over 1 million migrantar dei neste åra

Canada har planar om å ta imot over 1 million innvandrarar og flyktningar dei neste tre åra. Det utgjer nærare 1 prosent av befolkninga i landet kvart år.

Canada gav nærare 286.000 personar permanent opphald i 2017, og spår at det talet vil stige til 350.000 i år. Neste år ventar landet å ta imot 360.000, og i 2021 planlegg Canada å gi 370.000 menneske moglegheita til å bu fast i landet, skriv CNN.

- I stor grad takka vere alle nykommarane vi har teke imot gjennom historia vår, har Canada utvikla seg til å bli det sterke og flotte landa vi alle elskar, seier innvandring- og flyktningminister Ahmed Hussen.

Tilstrøyminga av nye landsmenn bidreg til å forynge den aldrande befolkninga i landet, hjelper på den låge fødselsraten, og styrkjer arbeidskrafta, legg Hussen til. Den canadiske statsråden er sjølv fødd i Somalia.

Canadas vennlege innstilling til innvandrarar står i kontrast til mange andre vestlege land, inkludert nabolandet USA, som innfører stadig meir restriktiv innvandrings- og flyktningpolitikk. Canada er spesielt dedikert til å gi flyktningar vern, og minst 138.500 av dei som får opphald dei neste tre åra, skal vere flyktningar eller andre som treng vern, viser Canadas årlege immigrasjonsrapport.

(©NPK)

Canada, her ved statsminister Justin Trudeau, planlegg å ta imot over 1 million flyktningar dei neste tre åra. Foto: AP / NTB scanpix.

ANNONSE
Annonse