Canadiske biskopar lovar millionerstatning til kostskuleelevar
Katolske biskopar lovar å gi erstatning tilsvarande vel 200 millionar kroner til offera for overgrep gjort ved kostskular for Canadas urfolk.
Beløpet på 30 millionar canadiske dollar skal utbetalast over ein femårsperiode og gjere bot for lidingane elevane vart påførte i kostskulane, heiter det i ei fråsegn frå biskopforeininga CCB.
Rundt 150.000 barn frå urbefolkninga i Canada vart tvinga til å gå på skulane mellom 1831 og 1997. Der vart dei tvinga til å vende sin eigen kultur ryggen og tileigne seg vestleg kultur. Det var minst 130 slike skular i Canada.
Sinnet har vakse i landet etter at det sidan slutten av mai har vorte avdekt meir enn tusen umerka graver i nærleiken av dei tidlegare kostskulane. Fleire kyrkjer har vorte utsette for eldspåsetjingar etter at grava vart oppdaga.
Den canadiske regjeringa har innrømt at fysisk og seksuell vald var utbreidd på skulane, og elevar skal ha vorte fysisk straffa for å snakke morsmåla sine.
Biskopane uttrykte fredag ein «djup anger» då dei beklaga til urfolket.
(©NPK)
