Carlsen slo tet-rival – i delt leiing i Nederland
Magnus Carlsen deler leiinga i den prestisjetunge sjakkturneringa i Wijk aan Zee i Nederland. Han slo ungararen Richárd Rapport i den sjette runden fredag.
Sigeren gir Carlsen fire poeng etter dei første seks rundane og var den første triumfen på dei siste fire forsøka. Partiet fredag vart avgjort av ein tabbe av Rapport. I tillegg brukte han svært mykje tid. Ungararen gav seg etter 31 trekk.
Carlsen deler turneringsleiinga med Shakhriyar Mamedyarov og Santosh Gujrathi Vidit. Carlsen har ikkje møtt dei to enno.
Partiet på fredag starta jamt, og sjakkcomputeren kunne ikkje skilje mellom duellantane etter dei første åtte trekka. Dei hadde også lik tidsbruk fram til dette punktet. I trekket som følgde, brukte likevel Rapport 26 minutt, noko som kosta han dyrebar tid til tidskontrollen på 40 trekk. Begge hadde brukt mykje tid og hadde rundt 40 minutt til å utføre rundt 30 trekk.
I det 21. trekket til Rapport gjorde sjakkcomputerane utslag. Utslaga viste då ein solid fordel til Carlsen. Rapport hadde veldig lite tid mot slutten, og det utnytta nordmannen med dei kvite brikkene til fulle og vann.
Laurdag skal Carlsen møte indaren Rameshbabu Praggnanandhaa med svarte brikker.
(©NPK)
Magnus Carlsen slo Richárd Rapport fredag. Her er han under Norway Chess i fjor.
Foto: Carina Johansen / NTB
