Carlsens fjerde strake remis i Nederland
Verdsmeister Magnus Carlsen får den upopulære tittelen «remis-kongen» i sjakk etter å ha spelt det 21. partiet i langsjakk med remis.
Tysdag møtte han russiske Vladimir Kramnik med kvite brikker i fjerde runde av Wijk aan Zee-turneringa i Nederland. Det vart eit maratonparti, men etter nesten seks timar ved brettet tok spelarane kvarandre i handa og vart einige om remis etter 57 trekk.
Ingen av spelarane såg ut til få overtaket innleiingsvis. Etter 30 trekk var det framleis jamt, men nordmannen stod igjen med eit løparpar mot Kramniks to springarar.
- Då slår han remisrekorden til Anish Giri. Det er ein rekord han ikkje er stolt av, sa TV2s sjakkekspert Jon Ludvig Hammer.
- Eg trur Kramnik vil gå for remis, og det har han ein god sjanse til, sa TV 2 Hans Olav Lalum etter tre timar ved sjakkbrettet.
Carlsen og Kramnik spelte vidare i mange timar til i jakta på ei mogleg avgjerd, men litt før ti på sju tysdag kveld var det over.
Med ein ny remis rykker den tapande VM-motstandaren Fabiano Caruana nærare nordmannen på rankingtoppen. Caruana er ikkje med i turneringa.
Onsdag møter Carlsen heimespelaren Jorda van Foreest.
Alle tolv VM-partia mot Caruana enda med remis, men nordmannen sikra seg den fjerde VM-tittelen sin med siger i hurtigsjakken.
(©NPK)
Magnus Carlsen spelte ikkje noko stort parti med kvite brikker mot russaren Vladimir Kramnik. Foto: Dmitrij Lovetskij / AP / NTB scanpix
