Démare tok den tredje giro-etappesigeren sin – firemannsbrot innhenta på oppløpet

Etter 14 mil i brot vart tetkvartetten på Giro d'Italia-etappen fredag innhenta 700 meter frå mål. Arnaud Démare var igjen best i massespurten.

Den franske FDJ-ryttaren sigra framfor Phil Bauhaus og Mark Cavendish og kunne juble for den tredje etappesigeren sin i årets ritt. Det var den 11. Grand Tour-etappesigeren hans.

Lenge såg det ut til at anten Nicolas Prodhomme, Pascal Eenkhoorn, Julius van den Berg eller Mirco Maestri skulle få den første Grand Tour-etappesigeren sin. Dei stakk frå feltet etter berre ei mil av den 150 kilometer lange etappen og var åleine i front det meste av dagen.

Det såg ei stund ut til at hovudfeltet venta for lenge med å starte jobben med å ta dei igjen. Vel to mil før mål var forspranget to og eit halvt minutt. To og ein halv kilometer før mål i Cuneo hadde dei tatt inn 25 sekund, men det hadde røynt veldig på.

Van den Berg gjorde eit siste forsøk på å rykkje frå dei to andre, men då luka vart tetta og dei fire byrja å lure på kvarandre, var det køyrt. Gruppa vart eten opp av hovudfeltet, som henga seg til massespurt.

Juan Pedro López sykla sin niande dag i den rosa leiartrøya og får bruke den også laurdag.

(©NPK)

Juan Pedro López sykla den niande dagen i rosa leiartrøya i Giro d'Italia fredag. Foto: Fabio Ferrari, LaPresse via AP / NTB

ANNONSE
Annonse
ANNONSE
Annonse