Nordre

Danmarks statsminister vil sikre grensa mot Sverige etter eksplosjon

Statsminister Mette Frederiksen vil ha betre kontroll på grensa mot Sverige etter at to svenskar er mistenkte for eksplosjonen ved Skattestyrelsen.

- Dette må ikkje bli kvardagen vår i Danmark. Vi må ikkje bli vande til eksplosjonar, sa Mette Frederiksen på ein pressekonferanse onsdag.

Under pressekonferansen ville Frederiksen ikkje gå i detalj på korleis grensa kan sikrast. Det er derfor usikkert om det vil innebere innføring av grensekontrollar.

Det er ikkje pendlarane dei er ute etter å ta, men dei kriminelle, understreka Frederiksen.

- Det skal ikkje vere slik at du kan reise frå Sverige til Danmark og plassere ut dynamitt midt i København, seier den danske statsministeren.

Ho har allereie kontakta Sveriges statsminister Stefan Löfven om saka.

Ein svensk statsborgar (22) vart tysdag kveld arrestert i Malmö, sikta for å stå bak eksplosjonen ved Skattestyrelsen i København. Han skal no utleverast til Danmark, der han skal framstillast for varetektsfengsling.

Ein annan svenske er etterlyst internasjonalt. Denne mannen er 23 år gammal, ifølgje dansk politi.

(©NPK)

Danmarks statsminister Mette Frederiksen vil vurdere moglegheita for å sikre grensa til Sverige betre.
Foto: Philip Davali / Ritzau NTB scanpix / NTB scanpix

Store delar av fasaden til det danske skattevesenet bygning på Østerbro i København vart øydelagt i ein eksplosjon.
Foto: Ólafur Steinar Rye Gestsson / Ritzau NTB scanpix / NTB scanpix

ANNONSE
Annonse
ANNONSE
Annonse