Nordre

Den nye sjefen i oljefondet beklagar utsegn om arveavgift

Nicolai Tangen, som er tilsett som sjef for oljefondet, beklagar utsegnene sine om at arveavgifta burde vere på 100 prosent.

– Eg meiner at arveavgifta burde vere 100 prosent. Eg synest det er ekstremt urettferdig at nokon blir fødde med ein svær pengesekk. Alle burde starte på null, sa Tangen då han vart presentert som den nye sjefen i oljefondet på ein pressekonferanse torsdag.

No beklagar han fråsegna i eit innlegg på oljefondets Facebook-side. Det var E24 som omtalte saka først.

– Eg beklagar fråsegna mi om arveavgifta. Ein leiar for oljefondet skal heilt klart ikkje komme med utsegner som kan tolkast politisk, seier Tangen i innlegget.

Han seier vidare at utsegna om arveavgifta var knytt til den personlege meininga hans om arven til eigne born. Tangen har leia hedgefondet Ako Capital og hadde i 2019 ein anslått nettoformue på 5,5 milliardar kroner, ifølgje Kapital.

– Eg vil at dei skal finne sin eigen veg, og det å arve ein stor formue er ikkje noko eg ser på som ein fordel, seier Tangen.

– Eg ser at utsegna mi, som eigentleg var meint litt retorisk, kan oppfattast feil, det var på ingen måte meint som eit politisk utspel så dette beklagar eg, seier han.

(©NPK)

Oljefondets nye sjef, Nicolai Tangen, beklagar sine utsegner om arveavgifta. Foto: Nina E. Rangøy / NTB scanpix

ANNONSE
Annonse