Den sikta i København ringde hjelpetelefon før kjøpesenter-skytinga
22-åringen som er sikta etter skytinga på eit kjøpesenter i København prøvde å ringje ein hjelpetelefon berre timar før angrepet, men tenesta var stengd.
Berre timar før han skaut og drap tre personar på kjøpesenteret Field's, ringde 22-åringen ein hjelpetelefon for akutte psykiske vanskar, ifølgje Danmarks Radio. Men telefonlinja var stengd sidan det var søndag ettermiddag.
Ein talsperson for hjelpetelefontenesta han ringde vil ikkje kommentere den konkrete hendinga, og understrekar at alle som tek kontakt med dei er heilt anonyme. Allereie for eit halvår sidan vart det sett søkjelys på at det er vanskeleg å nå igjennom til hjelpetelefontenester i Danmark.
22-åringen vart måndag varetektsfengsla i 24 dagar på lukka psykiatrisk institusjon. Det er åtferda til den sikta, nokre av utsegnene hans og den tidlegare kontakten mannen har hatt med psykiatrien som er grunnlaget for at han blir overført til ein psykiatrisk institusjon.
Han er sikta for tre drap, sju drapsforsøk og brot på våpenlova.
(©NPK)
22-åringen som skaut og drap fleire personar på kjøpesenteret Field's i København, prøvde å ringje ein hjelpetelefon berre timar før angrepet. Foto: Mads Claus Rasmussen/Ritzau scanpix / NTB
