Det internasjonale sjakkforbundet kritisk til Carlsen

– Først av alt, meiner vi at verdsmeisteren har eit moralsk ansvar knytt til statusen sin sidan han blir sett på som ein global ambassadør for spelet. Handlingane hans påverkar omdømmet til kollegaene, resultat og kan vere øydeleggjande for sporten. Vi meiner at det finst betre måtar å handtere denne situasjonen på, skriv Fide i ei pressemelding.

Bakgrunnen for pressemeldinga er ein disputt mellom Carlsen og Niemann dei siste vekene. Nordmannen trekte seg nyleg frå storturneringa Sinquefield Cup i USA etter å ha tapt for nettopp Niemann. I etterkant har det sirkulert hissige rykte om at årsaka var juks frå amerikanarens side.

Då Carlsen og Niemann møttest igjen i innleiinga i Grand Chess Tour-turneringa, trekte Carlsen seg etter eitt trekk og fyrte ytterlegare opp under debatten.

Niemann rauk seinare ut i kvartfinalen i turneringa.

Niemann har fleire gonger avvist på det mest bestemde at han gjorde seg skuldig i juks i Sinquefield Cup. Også sjefsdommaren i den årlege turneringa har vore ute og avvist at det finst indikasjonar på ureint spel.

Carlsen får også noko støtte frå forbundet.

– Samtidig delar vi hans (Carlsen) djupe bekymringar om korleis juks kan skade sjakken.

(©NPK)

Magnus Carlsen får kritikk frå det internasjonale sjakkforbundet. Foto: Carina Johansen / NTB