Det kvite hus gir CNN-journalist akkrediteringa tilbake

Det kvite hus gir CNN-journalist Jim Acosta tilbake presseakkrediteringa etter ordre frå ein føderal dommar. Samtidig strammar Det kvite hus inn regelverket.

Acosta, CNNs seniorreporter i Det kvite hus, vart i førre veke fråteken akkrediteringa si etter at han nekta å gi frå seg mikrofonen under ein pressekonferanse der det oppstod ein oppheita diskusjon mellom han og president Donald Trump.

I etterkant av opptrinnet har CNN saksøkt Trump og fleire av rådgjevarane hans. Eitt av krava var eit mellombels tiltak som skulle sørgje for at Acosta fekk akkrediteringa si tilbake mens resten av søksmålet blir handsama.

Fredag fekk CNN medhald i kravet i ein domstol i Washington.

- Som svar til retten, vil journalisten mellombels få tilbake presseakkrediteringa si, sa president Donald Trumps talskvinne Sarah Sanders kort tid etter kunngjeringa.

Ho held moglegheita open for at Det kvite hus seinare vil prøve å ta frå Acosta akkrediteringa igjen, og seier nye reglar skal bli innført «for å sikre rettferdige og velordna pressekonferansar».

Det kvite hus har hevda at Trump har breie fullmakter til å avgrense tilgangen til media.

Varslar innstramming

Det kvite hus braut truleg Acostas rettstryggleik, uttalte dommar Timothy Kelly fredag.

CNN har i søksmålet sitt hevda at Det kvite hus har brote Acostas rettar i samsvar med det første og femte grunnlovstillegget. Dommaren handsama ikkje denne delen av søksmålet fredag, berre det mellombelse tiltaket som CNN bad om, og varsla at resten av søksmålet skal bli handsama seinare.

Sanders tolkar det som ein siger.

- I dag har retten slått fast at det ikkje finst nokon absolutt rett grunngjeve i det første grunnlovstillegget til å få tilgang til Det kvite hus, sa ho.

- Vi skal også utvikle reglane og prosessen for å sikre rettferdige og velordna pressekonferansar i framtida. Det må vere anstendigheit i Det kvite hus, sa Sanders.

(©NPK)

Jim Acosta på veg til rettsmøtet i Washington onsdag.
Foto: Manuel Balce Ceneta / AP / NTB scanpix

Ein tilsett ved Det kvite hus prøver å ta frå Jim Acosta mikrofonen mens han spør president Donald Trump om Russland-etterforskinga på ein pressekonferanse 7. november. Foto: Evan Vucci / AP / NTB scanpix

Annonse
Annonse