Dette er Raudts nye stortingsgruppe

Raudts 39 år gamle leiar, Bjørnar Moxnes, er den einaste av dei åtte som har sete på Stortinget før. Han blir òg ein av dei eldste i den nye stortingsgruppa til partiet etter brakvalet måndag. Raudt enda på 4,7 prosent av stemmene.

Med seg på direktemandat frå Oslo får Moxnes tidlegare leiar i Raud Ungdom (RU) Seher Aydar. I tillegg vart den eine nestleiaren i partiet, Marie Sneve Martinussen, vald inn direkte frå Akershus. 2. nestleiar Silje Jostein Kjosbakken blir dermed Martinussens vara.

Partiet får òg eit direktemandat frå Hordaland, der Sofie Marhaug står på topp. Ho har fram til no vore gruppeleiaren for partiet i Bergen bystyre.

Mimir Kristjansson skal på Stortinget

Dei fire andre mandata til Raudt er utjamningsmandat, som no er relativt sikre, men der ein framleis må ta nokre små atterhald om at endringar kan skje.

Slik valresultatet er no, går utjamningsmandata til mellom anna Mimir Kristjansson, som kjem inn frå Rogaland. Han er tidlegare RU-leiar, forfattar og journalist, og har dei siste to åra vore lokalpolitikar i Stavanger.

Ein annan tidlegare leiar for ungdomsorganisasjonen som ser ut til å komme inn, er Tobias Drevland Lund frå Telemark. 25-åringen var leiar for Raud Ungdom frå 2018 til 2020 og har òg vore aktiv i lokalpolitikken i Kragerø.

47-åring eldst

Dei to siste utjamningsmandata ser ut til å gå til Raudts toppkandidatar i Trøndelag: Hege Bae Nyholt i Sør-Trøndelag og Hanne Lise Fahsing i Nord-Trøndelag. Begge er lokalpolitikarar og sentrale i fagrørsla i Trøndelag.

Fahsing på 47 er den eldste i gruppa, som har ein gjennomsnittsalder på 36. Den inneheld fem kvinner og tre menn.

(©NPK)

Raudt-leiar Bjørnar Moxnes (midten) skal halde gruppemøte med andre enn seg sjølv framover. Han får selskap på Stortinget av blant andre Marie Sneve Martinussen (t.v.) og Seher Aydar.
Foto: Trond Reidar Teigen / NTB / NPK